9 қазан күні Бозанбайдағы Бүркіт төбеде «Шығыс Салбурыны — 2025» халықаралық фестивалі басталды. Бүгін айтулы шараның екінші күні өтіп жатыр. Алыс-жақыннан келген қатысушылар бүгін қаршығаны қолға шақырып, бүркітті шырғаға салады, деп хабарлайды F16.kz.
Айта кетейік, биыл бесінші мәрте ұйымдастырылып жатқан фестивальге еліміздің түкпір-түкпірінен және алыс-жақын шет мемлекеттерден жүзден астам қатысушы келді.
Шығыс Қазақстанға алғаш рет келіп тұрмын. Халықаралық фестивальге 100-ден астам құс қатысып жатыр, оның ішінде мен қаршығаға баға беремін. Бүгінгі таңда біздің елде де құсбегілік жылдан-жылға дамып келеді. Осындай шаралар өтіп тұрады. 11 қазан күні біздің елде Манас ойындары өтеді. Ол ойындардың біз үшін маңызы ерекше, ел болып күтетін мереке. Сондықтан Қырғызстаннан қатысушылар, делегация келе алмады. Ағайындар сыйлап шақырған соң төрешілік ету үшін жалғыз келдім. Мұнда келгелі байқағаным – тіліміз бен дәстүріміз ғана емес, Шығыстың жері де, елі де бізге өте ұқсайды екен, — деді қырғызстандық төреші.
Бүркітін баптап, елге арайы келген қатысушылар ішінде Моңғолия Халық Республикасының құсбегілері де бар.
Осы фестиваль үшін атамекенге арнайы ат басын бұрдық. Бүркітімнің аты – Ақиық. Бұл атты таңдауымның өзі тегін емес. Бабы жақсы деп айта аламын. Шара жоғары деңгейден ұйымдастырылған, бізді де ерекше қонақжайлық танытып, жақсы қарсы алып жатыр. Мұндай ауқымды шаралар елдің атын шығара берсін. Барша қатысушыларға сәттілік тілеймін, — деді Баян-Өлгей аймағынан келген қатысушы Алпамыс Далайқанұлы.
