Еңбек күші артық Түркістан облысынан халық сирек қоныстанған Шығыс Қазақстан өңіріне 40 адамнан тұратын делегация келе жатыр. Күнгейден сапар шеккен қонақтар аймақтың бірқатар ауданын аралап, ондағы әлеуметтік-экономикалық жағдаймен, еңбек және баспанамен қамту мүмкіндіктерімен танысады, деп хабарлайды F16.kz.
Түркістандық делегация Шығыста 11–13 шілде аралығында болады. Сапар барысында олар Самар, Үлкен Нарын, Марқакөл, Күршім, Тарбағатай, Зайсан және Катонқарағай аудандарына ат басын бұрып, өмір сүрудің әлеуметтік-экономикалық жағдайымен, еңбекпен қамтылу мүмкіндіктерімен, инфрақұрылыммен және тұрғын үймен қамтамасыз етілу жағдайымен танысады. Сондай-ақ бағдарлама аясында аудан әкімдіктерімен, жұмыс берушілермен кездесулер өткізу, әлеуметтік нысандар мен тұрғын үй қорын аралау, бос жұмыс орындары жәрмеңкесін және ақпараттық-түсіндіру іс-шараларын өткізу көзделген.
Сапардың мақсаты – қабылдаушы өңірдің оң имиджін қалыптастыру, үміткерлердің қоныс аудару туралы шешім қабылдауына ықпал ету, сондай-ақ еңбек ресурстарын теңгерімді орналастыруға және ауылдық аумақтарды дамытуға жәрдемдесу.
Іс-шараны облыстық жұмыспен қамту және әлеуметтік бағдарламаларды үйлестіру басқармасы мен Еңбек мобильділігі орталығы ұйымдастырып отыр.
Қоныс аудару бойынша толық ақпарат алу үшін байланыс номері 8-707-297-52-57
