Шығыс Қазақстан облысының жас өнертапқыштары халықаралық робототехника чемпионатында жоғары нәтиже көрсетіп, Қазақстан атынан Азия чемпионатына қатысу мүмкіндігіне ие болды, деп хабарлайды F16.kz сайты.
30 маусым – 1 шілде күндері Алматы қаласында өткен Almaty Tech Cup XII: Age of AI халықаралық чемпионаты биыл 3000-нан астам қатысушының басын қосты. Қазақстанның барлық өңірлерінен және шетелден келген мектеп оқушылары, студенттер мен жас инженерлер робототехника, жасанды интеллект, дрон технологиялары, киберқауіпсіздік, аэроғарыш және өзге де 14 бағыт бойынша бақ сынады.
Беделді додада FIRST LEGO League Challenge санатында өнер көрсеткен «RoboSpark» командасы үздік атанып, Алматы қаласы әкімінің кубогын иеленді. Бұл жеңіс командаға чемпиондық атақпен қатар, Қытай Халық Республикасының Бейжің қаласында өтетін Азия чемпионатына жолдама сыйлады.
Команда құрамында Шығыс Қазақстан облысының үш талантты оқушысы өнер көрсетті. Олар – облыстық мамандандырылған IT мектеп-лицейінің 4-сынып оқушысы Әмина Кенжеханқызы, Өскемен қаласындағы Абай атындағы №33 орта мектептің 10-сынып оқушысы Інжу Кенжеханқызы және осы мектептің 9-сынып оқушысы Іңкәр Кенжеханқызы.
Бір ерекшелігі – үш оқушы да бір отбасының балалары. Апалы-сіңлілі жас өнертапқыштардың халықаралық чемпионатта бір команда құрамында жеңіске жетіп, Азия біріншілігіне жолдама алуы – өңір үшін айтулы жетістік.
Чемпионат барысында қатысушылар инженерлік жобаларын қорғап, роботтарды бағдарламалау, автономды жүйелерді әзірлеу, дрондарды басқару және жасанды интеллект технологияларын қолдану бойынша өз білімдері мен тәжірибелерін ортаға салды.
Енді шығысқазақстандық оқушылар Бейжіңде өтетін Азия чемпионатында Қазақстанның намысын қорғайды. Бұл жетістік өңірдегі инженерлік білім беру мен робототехника бағытының қарқынды дамып келе жатқанын тағы бір мәрте дәлелдейді.
Оқушылардың тәлімгері жас өнертапқыштарға алдағы халықаралық додада сәттілік тілеп, ел абыройын асқақтататын жаңа жеңістерге жететініне сенім білдірді.
