Шығыс Қазақстанда аквамәдениет қарқынды дамып жатыр. Қазір облыста тауарлы балық өндірісімен үш іргелі кәсіпорын айналысады. Алдағы бес жыл ішінде облыс тауарлы балық өндірісін жылына 9,7 мың тоннаға жеткізуді жоспарлап отыр, деп хабарлайды F16.kz.
Облыстық табиғи ресурстар және табиғат пайдалануды реттеу басқармасы басшысының орынбасары Мерхат Әміровтің айтуынша, кейінгі жылдары өңірде балық шаруашылығын дамытуға ерекше басымдық беріліп келеді. Нәтижесінде 2030 жылға қарай жыл сайын 9 774 тонна тауарлы балық өндіру межесіне қол жеткізіледі. Оның ішінде 8 578 тоннасы албырт тұқымдас, 1 151 тоннасы тұқы тұқымдас және 45 тоннасы бекіре тұқымдас балықтар. Осы ретте басқарма басшысы аймақта албырт тұқымдас балықтарды өсіру көлемі артқанын атап өтті.
Бұл өсімге жобалық қуаттылығы 3 233 тонна болатын бес мамандандырылған учаскенің іске қосылуы ықпал еткен. Ал тұқы тұқымдастарын өндіру бағытына 15 көл шаруашылығы мен «БУӨШ» ЖШС-нің тоған шаруашылығы серпін беріп отыр: олардың жоспарлы көрсеткіші тиісінше 378 және 773 тонна. Бекіре өсіру бағытында жылына 45 тонна өнім беретін «ОстФиш» ЖШС-ның орны бөлек, — деді ол.
Саланы алға бастыратын негізгі факторлардың бірі – жем-шөп. 2030 жылға қарай жемге сұраныс 15 мың тоннаға жетеді деп болжам жасалған. Қазір бақтақ (форель) өсіретін шаруашылықтар импорттық жемге тәуелді. 2025 жылдың алғашқы тоғыз айында 720 тонна жем сырттан әкелінді. Ал тұқы тұқымдастарын азықтандыру үшін жергілікті жем пайдаланылады.
Шабақтарға деген қажеттілік те жылдан-жылға арта түскен. Бұл бағытта «ШығысУниверсал» және «Гранд Фиш» серіктестіктерінің инкубациялық цехтары жақсы жұмыс істеп тұр. Тек биылдың өзінде бұл екі кәсіпорын 2,3 млн бақтақ шабағын өсіріп шығарды. Сонымен бірге «ОстФиш» өз күшімен 250 мың бекіре шабағын инкубациялап отыр.
Кейінгі төрт жылда облыста 6,2 мың тонна шабақ өсірілді. Ал осы жылға межелеген тауарлық балық жоспары – 2 302 тонна. Биылғы тоғыз айда 1 310 тонна балық өндірілді. Жалпы, өңірде балық шаруашылығына мемлекеттік қолдау жақсы. Биыл жергілікті кәсіпорындар 130,5 млн теңге субсидия алды, жыл соңына дейін тағы 138,9 млн теңге бөлінеді. Осылайша жалпы көлем 269 млн теңгеден асады. Оған қоса инвестициялық шығындарды өтеуге 7,4 млн теңге қарастырылған, – деді Мерхат Әміров.
