Өскеменде 31 наурыз бен 3 сәуір аралығында ағайынды Абдуллиндер атындағы өнер училищесінде әншілердің өңіраралық байқауы өтеді. Биылғы өнер додасы қазақ вокал өнерінің көрнекті өкілдері Ришат Абдуллин мен Муслим Абдуллиннің 110 жылдығына арналды, деп хабарлайды F16.kz.
Ағайынды Абдуллиндер – Қазақстандағы кәсіби вокал өнерінің негізін қалаушылардың бірі. Олар қазақ әндерін алғаш рет дуэтпен орындап, классикалық репертуарды кеңінен насихаттаған. Дарынды әншілердің шығармашылығы ұлттық вокал мектебінің қалыптасуына зор ықпал етіп, бүгінгі күнге дейін жоғары орындаушылық шеберліктің үлгісі ретінде бағаланады.
Биылғы байқауға еліміздің әр өңірінен келген жас орындаушылар қатысады. Сахнада 32 солист пен төрт вокалдық ансамбль өнер көрсетіп, жалпы саны 36 нөмір ұсынылады. Қатысушылар қатарында Өскемен, Алматы, Астана, Шымкент, Павлодар және Қызылорда қалаларындағы музыка колледждері мен мамандандырылған оқу орындарының студенттері бар.
Байқаудың негізгі мақсаты – академиялық вокал өнерін дамыту, жас таланттарды анықтау және орындаушылардың кәсіби деңгейін арттыру. Сонымен қатар ұйымдастырушылар мәдени мұраны сақтау, жастардың классикалық өнерге қызығушылығын ояту және патриоттық құндылықтарды дәріптеуге ерекше мән беріп отыр.
Ұйымдастырушылардың айтуынша, бұл жоба жыл сайын жас әншілер мен кәсіби қауымдастықтың басын қосатын маңызды мәдени алаңға айналып келеді. Байқау жаңа есімдерді танытып, отандық вокал өнерінің дамуына серпін береді деген сенім бар.
Өтетін орны: Өскемен қаласы, 30-шы Гвардиялық дивизия көшесі, 4-үй, №1 оқу корпусының акт залы
Өтетін уақыты: 2026 жылғы 31 наурыз – 3 сәуір. Байланыс нөмірі: 8 (7232) 60-85-40.
