Шығыс Қазақстан облысы аумағының 52%-ын әлі де қар басып жатыр. Құзырлы мекемелер су айдындарында тұрақты мониторинг жүргізіп, тәулік бойы кезекшілік ұйымдастырған, деп хабарлайды F16.kz.
Ақпан айының үшінші онкүндігінен бастап арналар, арықтар, құбырлар мен көпірлер тазартылған.
Су тасқынына қарсы жұмыстар 100 % орындалды. 432,2 мың текше метр қар шығарылды. Жағдай күрделенген жағдайда облыс әкімдіктерінің резервінде 82,2 мың дана қаптар, 10,278 тонна инертті материалдар, 393,65 тонна жанар-жаңармай бар, — дейді ШҚО ТЖД баспасөз қызметі.
Өңірде күшейтілген іс-шаралар жалғасады. Гидропосттар арқылы өзен деңгейі бақыланып, қауіпті учаскелерге әуеден мониторинг жүргізілуде.
Халыққа түсіндіру жұмыстары да жүргізіледі. Бүгінде 636 рейд ұйымдастырылды. Тұрғындарға үйдің жанындағы арықтарды алдын ала тазалау ұсынылады, — дейді департаменттің баспасөз қызметі.
