Шығыс жұрты тағы бір рекорд тіркеуді көздеп отыр. Бұл жолы өңірдің қолөнер шеберлері ұзындығы 2 шақырымнан асатын құрақ көрпе жасап таңғалдырмақ, деп хабарлайды F16.kz.
Облыстық мәдениет басқармасының мәліметінше, 15-17 мамыр күндері Өскеменде ұлттық өнерді ұлықтауға арналған «Ғасырлық дәстүрлер» атты ауқымды фестиваль ұйымдастырылмақ. Іс-шара барысында ұзындығы 2 шақырымнан асатын алып құрақ көрпе жайылып, әлемдік рекорд жаңарту жоспарланып отыр.
Халықаралық музейлер күніне орай қолға алынған фестивальге сегіз мемлекеттен және Қазақстанның әр өңірінен 800-ден астам қолөнерші қатысады.
Ауқымды шара облыс әкімдігінің қолдауымен және мәдениет басқармасының ұйымдастыруымен өтеді, – деп жазды облыстық мәдениет басқармасы әлеуметтік желідегі ресми парақшасында.
Айта кетейік, бұл жыл басынан бергі рекордқа өтініш берілген екінші бастама. Биылғы Наурыз мерекесінде Өскеменнің орталық алаңында облыс әкімі Нұрымбет Сақтағанов бастаған 5 мыңнан астам домбырашы бір мезетте ұлттық аспаппен «Ақбұлақ» әнін шырқап, дүниежүзілік рекорд тіркеген болатын.
