AMANAT партиясының төрағасы Ерлан Қошанов Шығыс Қазақстан облысында бірқатар әлеуметтік нысан мен кәсіпорынның жұмысымен танысты, деп хабарлайды F16.kz.
Мәжіліс спикері сапар барысында «Үлбі ЖБҚ» ЖШС-ға барды. Аталмыш кәсіпорын атом электр стансаларына арналған жылу бөлгіш құрастырмалар өндіреді. Бірлескен қазақ-қытай кәсіпорны саналатын зауыт бүгінде Орталық Азиядағы жалғыз кәсіпорын.
Зауыт жылына 200 тонна уран отынын өндіруге әлеуетті. Ол алты энергоблок үшін толық жеткілікті. Бүгінде зауытта 200-ге жуық адам, соның ішінде жоғары білікті қазақстандық инженерлер жұмыс істейді.
Зауыт Қазақстанда салынатын атом электр стансаларын ядролық отынмен толық қамтамасыз етуге әлеуетті және отандық ядролық кластердің маңызды құрамдас бөлігі саналады, — деді Ерлан Қошанов.
Еске сала кетейік, бүгінде Мәжіліс депутаттары өңірлердегі көшпелі жұмыс аясында өндірістік және әлеуметтік нысандарға барып, еңбек ұжымдарымен кездесіп, азаматтарды жеке мәселелері бойынша қабылдады. Бұл ретте шалғайдағы елді мекендерге ерекше назар аударылды.
Депутаттар ел Президенті берген тапсырмалардың жергілікті жерлерде жүзеге асырылу барысын бақылап, жаңадан қабылданған заңдардың іс жүзінде қалай жұмыс істеп жатқанын зерттейді және оларға қатысты кері байланыс алады. Азаматтар мен бизнесті толғандырған өзекті мәселелермен танысады.
