Еліміздің бірнеше өңірінде ветеринариялық стансалардың техникалық жағдайы мүшкіл. Оның қатарында Шығыс Қазақстан облысы да бар, деп хабарлайды F16.kz.
Өңірлерде ветериналық стансаларға тиесілі меншікті ғимарат жоқ, материалдық базалары да әбден тозған, ал ветеринарлардың жалақысы мардымсыз.
Аудандардағы 206 ветеринариялық стансаның 72-сінің меншікті ғимараты жоқ. Мысалы, Абай облысында 10 аудан орталығының тек үшеуінде ғана меншікті ғимарат бар. Осындай жағдай Шығыс Қазақстан, Атырау, Ақмола және Маңғыстау облыстарында да байқалады, — деді Ауыл шаруашылығы министрі Айдарбек Сапаров Үкімет отырысында.
Ветеринариялық пункттердің жағдайы бұдан да нашар. Ел бойынша 71% ветпункт қажетті ғимаратпен қамтамасыз етілмеген.
Ветпункттерде барлық ветеринариялық-алдын алу шарасы өткізіледі. Олар малға екпе салып, ем жасайтын қоршаулармен, жабдықтармен қамтамасыз етілуге тиіс. Алайда, еліміздегі 2 285 ветпункттің 1 628-і немесе 71%-ы қажетті ғимаратпен қамтамасыз етілмеген, — деді Айдарбек Сапаров.
Айта кетейік, ел Президентінің тапсырмасын іске асыру аясында биыл 323 ветеринариялық пункттің құрылысын аяқтау жоспарланған.
