Ертіс өзенінде және өңірдегі ірі су қоймаларында албырт тұқымдас балықтарды аулауға уақытша тыйым салынды. Бұл шектеу олардың уылдырық шашу кезеңінде табиғи көбеюі және популяциясын сақтауы үшін қажет, деп хабарлайды F16.kz.
Зайсан–Ертіс бассейндік инспекциясының мәліметінше, шектеу келесі су айдындарында қойылды: Бұқтырма және Өскемен су қоймаларында, Ертіс өзенінде — Өскемен ГЭС-інен Шүлбі су қоймасына дейін, әрі қарай Шүлбі ГЭС-інен Павлодар облысының әкімшілік шекарасына дейін, Қаныш Сәтпаев атындағы каналдың №1 су қоймасында.
Аталған су айдындарында балық аулауға 10 қарашадан 10 желтоқсанға дейін рұқсат жоқ.
Сондай-ақ Бұқтырма су қоймасының «Қызыл ту» өткелінен төмен қарай Бұқтырма ГЭС-іне дейінгі аралықта да дәл осы мерзімде шектеу енгізілді.
Инспекция өкілдері табиғатты қорғау ережелерін сақтау – балық қорының тұрақтылығын қамтамасыз етудің басты жолы екенін ескертеді. Сондықтан осы кезеңде балықшылардың заң талаптарын орындауы маңызды.
