Өскемен қаласында Түркітілдес журналистер қорының ұйымдастыруымен «Журналистикадағы жасанды интеллект және медиа этика» семинар-тренингі өтті, деп хабарлайды F16.kz.
БАҚ өкілдерінің басын бір арнаға тоғыстырған жиында журналистер қаржылық сауаттылық, жасанды интеллект, медиа этика және «YouTube-2025: жаңа трендтер», монетизация, кіріс көзін диверсификациялау, авторлық сайт ашып, ниша таңдау тақырыптарында білімін жетілдірді.
Айта кету керек, Түркітілдес журналистер қорының Halyk Bank серіктестігіндегі «Halyk-пен қаржылық сауат» жобасы былтыр басталған. Екі жылда Қазақстанның 11 қаласында семинар өткізіп, журналистердің кәсіби біліктілігін арттырып, шеберлігін шыңдап қана қоймай, қаржылық сауатын ашуға да үлес қосып келеді.
Былтыр бұл семинар Ақтау, Атырау, Ақтөбе, Қызылорда, Шымкент пен Түркістанда өткен. Биыл Орал, Қостанай, Семей, Тараз және Өскеменде өткіздік. Шығыста ұйымдастырылған тренингке тек қаладан емес, шалғай аудандардан да қазақша ақпарат тарататын тілшілер келіп, қатысты. Ақпараттық қауіпсіздік, жасанды интеллект, верификация төңірегінде мол мәлімет айталды, — дейді Түркітілдес журналистер қоры” ҚҚ президенті Нәзия Жоямергенқызы.
Қазір күн сайын қарыштап дамыған технологиямен қатар, алаяқтардың айласы да жаңарып отырады. Аңдамай, ойда-жоқта опық жеп қалғандар да аз емес. Алаяқтың арбауына түсіп қалмас үшін халыққа жеткілікті ақпарат таратылуы керек. Осы орайда БАҚ өкілдері халықпен тығыз жұмыс істейтіндіктен қаржылай сауатты болуы маңызды.
БАҚ өкілдері халықпен тығыз жұмыс істейтіндіктен қаржылай сауатты болуы маңызды. Ғаламтор желісінде алаяқтық өршіп тұрған уақытта біздің де білімімізді жетілдіріп отыруымыз маңызды. Осы орайда бізге жеткілікті мағлұмат берілді, — дейді облыстық мәдениет басқармасының баспасөз хатшысы Әлия Әубәкірова.
Келелі әңгіме, маңызды деректер айтылған басқосуға Шығыстан 30-дан астам журналист қатысты.
