Шаһар басшысы Алмат Ақышов қаладағы бірнеше демалыс орнына барып, абаттандыру жұмысын тағы бір пысықтап шықты, деп хабарлайды F16.kz.
Қала әкімі көшелерді жаяу аралап, тұрғындар жиі шағымданатын немесе өзі байқаған кемшіліктерді тез арада жоюды тапсырды.
21 сәуір күні Алмат Ақышов былтыр салынған Қазақстан көшесіндегі жаяу жүргіншілер аймағына, Ертіс көпірі астындағы салынған алаңға және биыл жөндеу жоспарланған Амфитеатр маңына барды.
Қазақстан көшесі — қаланың орталығы. Адам көп жүреді. Былтыр орындықтар, ойын алаңы қойылып, қоқыс жәшіктері орнатылған. Жақында көгалдандыру жұмысы басталады. Қала тұрғындарына жайлы әрі қауіпсіз қоғамдық орта құру — біздің негізгі міндеттеріміздің бірі. Аталған нысандар заманауи талаптарға сай жабдықталған және тұрғындардың бос уақытын тиімді өткізуіне мүмкіндік береді, — деді қала әкімі.
Сонымен қатар ол бөлім басшыларына нысандардың санитарлық жағдайын тұрақты бақылауда ұстау, инфрақұрылымды жақсарту және анықталған кемшіліктерді жедел түрде жою бойынша нақты тапсырмалар берді.
Шаһар басшысы тұрғындардың сүйікті демалыс орындарының бірі — Славский жағалауына да барды. Жаз мезгілінде мұнда отбасымен серуендеуге, спортпен айналысуға келетіндер қарасы арта түседі. Қала қонақтары мен туристер де Ертістің жағалауына келіп, серуен құрады.
Сондықтан әкім демалыс орнының тазалығы мен әдемілігіне баса назар аударуды тапсырды.
Жақтаулардағы ескі бояу бұл жердің сәнін бұзып тұр. Түрлі-түсті, мүмкін ашық түстермен, жалпы мұнда келушілерге жақсы әсер беріп, көңіл-күй сыйлайтын түстермен қайта бояу керек. Түрлі суреттер салуға да болады, — деді ол.
Сонымен қатар Әуезов даңғылы аумағын абаттандыру жөнінде нақты тапсырмалар берілді. Онда брусчатканы толығымен қайта жаңартып, орындықтар мен қоқыс жәшіктерін орнату жоспарланып отыр.
