Өскеменнің Согра шағын ауданы тұрғындары бүгінгі референдумға бір кісідей жиналып барды. М.Шаяхметов атындағы мектепте орналасқан №49 референдум учаскесіне көршілер ұлттық киім киіп, әндетіп келді, деп хабарлайды F16.kz.
Шағын аудан тұрғыны, зейнеткер Қуандық Ибраев Ата заңға енгізілген өзертулер еліміз үшін аса маңызды екенін атап өтті.
Бүгінгі референдумға көршілер жиналып дауыс беруге келдік. Бұл біздің азаматтық парызымыз. Жалпы біздің көршілер тату әрі ұйымшыл. Сенбілік болсын, Наурыз мерекесі болсын және басқа да маңызды іс-шараларда бәріміз бір кісідей атсалысамыз. Еліміздің болашағы үшін маңызды шешімдер қабылданып, Ата заңға өзгерістер енгізіліп жатқанда шет қалғанымыз дұрыс болмайды деп өз таңдауымызды жасауға келдік, – деді зейнеткер.
Дауыс беру учаскесіне ұлттық киім киіп, әуелетіп ән салып келген көршілерді көрген өзге жұрт тұрғындардың ауызбіршілігіне риза болды. Бұл көрініс Ұлыстың ұлы күні Наурыз мейрамы қарсаңындағы мерекелік көңіл күйді одан сайын көтеріп тастады. Согра шағын ауданы ардагерлер кеңесінің төрағасы Наталья Уколова зейнеткерлер барлық іс-шараларға белсенді қатысатынын айтты.
Аға буын өкілдері барлық мерекелерге атсалысып, белсенділік танытып жүреді. Бүгін де бәріміз жиналып, бір көшеде тұратын көршілер дауыс беруге келдік. Референдум еліміздің болашағы, өскелең ұрпақ үшін маңызды. Сондықтан біз бүгінгі саяси науқанға ұлттық киім киіп, әндетіп, мерекелік көңіл күйде келдік, – деді ардагерлер кеңесінің төрағасы.
