Ұлы Отан соғысының және ішкі істер органдарының ардагері Құрмат Рахимов 101 жасында дүниеден өтті, деп хабарлайды F16.kz.
Құрмат Рахимұлы Күршім ауданының Қызылтас ауылында дүниеге келген. 1942 жылы майданға шақырылып, 1-Балтық және 3-Беларусь майдандарының құрамында Литва, Беларусь республикаларын, Шығыс Германияны азат етуге, Кенигсбергті алуға қатысты.
Ерлігі үшін жауынгерлік наградалармен, II дәрежелі Отан соғысы ордені, «Кенигсбергті алғаны үшін», «Әскери еңбегі үшін», «Құрмет», «1941-1945 жылдардағы Ұлы Отан соғысында Германияны жеңгені үшін» медальдарымен марапатталған.
Ұлы Жеңістен кейін де ол Отанына қызмет етті. Әскери училищені бітірген соң көп жыл бойы мемлекеттік шекараны қорғады. Кейін Шығыс Қазақстан облысының ішкі істер органдарында жауапты лауазымдар атқарып, құқықтық тәртіпті қамтамасыз етуге елеулі үлес қосты.
Құрметті демалысқа шыққаннан кейін де Құрмат Рахимұлы тынымсыз еңбек етіп, кітап жазды, жастармен кездесіп, қоғамдық өмірге белсене араласты.
Құрмат Рахимұлымен қоштасу 11 сәуірде сағат 10.00-де Буров көшесі, 8/5 мекенжайында өтеді.
