Биыл Өскеменде абаттандыру жұмысы жалғасын тауып, бірқатар жоба іске асырылады. Славский жағалауындағы «Сәулетай» саябағы жаңғыртылып, студенттер қалашығында аллея салынады. Ертістің етегіндегі Амфитеатрға стационарлық сахна қойылады. Бұл жұмыстардың барысын тұрғындармен кездесуде қала әкімі Алмат Ақышов баян етті, деп хабарлайды F16.kz.
Республика алаңында болатын мерекелік іс-шаралардың бір сыпырасы енді Амфитеатрда өткізіледі. Биыл жазда онда стационарлық сахна орнатылып, абаттандырылады. Демек орталық алаңды жиі-жиі жауып, көлік қозғалысына кедергі келтірмейтін болады.
Республика алаңын жылына үш рет ғана жабатын боламыз: Наурызда, Қала күні мен Конституция күнінде, Жаңа жылда. Басқа кезде мерекелік іс-шаралар Амфитеатрда өткізіледі. Онда сатционарлық сахна қойылады, – деді Алмат Ақышов.
Сондай-ақ мұнда мемлекеттік қызметшілер ант қабылдайды. Ол үшін еліміздің көк байрағы орнатылмақ.
Өскеменнің көркіне көрік қосатын нысандардың тағы бірі – студенттер аллаясы. Жаңа аллея өңірдегі екі іргелі оқу орны – Д.Серікбаев атындағы ШҚТУ мен С.Аманжолов атындағы ШҚУ-дың негізгі ғимараттары тұрған студенттер қалашығы маңында салынады. Жергілікті билік нысанның эскизін жасау мүмкіндігін жастардың өзіне қалдырып отыр.
Біз студенттер арасында конкурс өткіземіз, жастар болашақ саябақтың жобасын өздері ұсынады. Содан кейін үздік шыққан эскиз бойынша ШҚТУ жатақханалары орналасқан аумаққа жақсы бір сквер жасаймыз, – деді шаһар басшысы.
Славский жағалауындағы «Сәулетай» саябағы қайт түлейтін күн жақын. Ілгеріде дүркіреп тұрған балалардың демалыс орны кейінгі жылдары тозып, кетеуі кете бастаған еді. Биыл қала билігі нысанды жаңғартуға шешім қабылдады.
Былтыр саябақты аралап шықтым. Жағдайы өте нашар. Арамшөп қаптап кеткен, шағын сәулет мүсіндер қираған. Биыл біз ол жерді тазартып, бәрін қайта жасаймыз. Тұрғындар демалатын, серуендейтін жақсы орынға айналадады, – деді Алмат Ақышов.
Сонымен қатар биыл іске асырылатын жобалардың қатарында Спорт сарайынан Назарбаев даңғылы бойымен Ушанов алаңына дейінгі аралыққа созылып жатқан аллея да бар. Жолүсті өткелі салынғалы бері бірнеше жыл адам аяғы сап тиылған жасыл дәліз қайта жайқалып, жаңғыртылады. Көшеттер егіліп, гүлзарлар қойылады. Орындықтар мен қоқыс жәшіктері орнатылады.
