Өскемендегі Студенттер аллеясының жобасын жастардың өзі әзірлейтін болды. Бұл туралы қала әкімі Алмат Ақышов студенттермен өткізген кездесуден кейін әлеуметтік желіде жазды, деп хабарлайды F16.kz.
Кездесу Д.Серікбаев атындағы Шығыс Қазақстан техникалық университетінде ұйымдастырылды. Жиында шаһар басшысы облыс орталығында іске асырылып жатқан жобалар, инфрақұрылымды дамыту және жастарды қолдауға бағытталған бастамалар жөнінде сөз болды.
Биыл жүзеге асатын Студенттер аллеясының жобасын жасау студенттердің өзіне жүктелді. Алдағы уақытта жастармен бірлескен жобамыз жемісті жүзеге асады деген сенімдемін. Іс-шара аясында студенттерді толғандырған өзекті мәселелер көтеріліп, қойылған сұрақтарға нақты жауап бердім. Пікір алмасу ашық әрі іскерлік форматта өтті. Жастардың белсенділігі мен ұсыныстары әрқашан маңызды. Барлық көтерілген мәселелер назарға алынып, тиісті жұмыстар жүргізілетін болады, – деп жазды қала әкімі әлеуметтік желідегі парақшасында.
Кездесуден кейін қала әкімі студенттер әзірлеген жобалармен танысты.
