Өскемен әкімдігі қала шетіндегі қазаншұңқырларды абаттандырып, суға шомылатын жағажай жасамақшы. Өйткені бұл жер бұрыннан жаздың аптап ыстығында адамдардың жиі баратын сүйікті демалыс орнына айналған, деп хабарлайды F16.kz.
Бұл туралы өңірлік коммуникациялар қызметі алаңында өткен брифингте қала әкімінің орынбасары Абзал Мәулетханов мәлім етті. Оның айтуынша, аталған су айдыны ресми жағажай ретінде белгіленіп, шомылуға рұқсат берілмесе де ел ішінде кеңінен танымал. Бұл аумақта бірнеше жылдан бері қиыршық тас өндіріледі. Ал аумағы атшаптырым жерді алып жатқан алып шұңқырларға су толып, жасанды көлге айналған. Мәселен, үшінші қазаншұңқырға кіреберісте «Жеке меншік аумақ» деген жазуы бар тақтайша орнатылған. Дейтұрғанмен бірнеше жыл бұрын бұл жерде жағажай жасалып, жағалауда күнқағарлар қатар түзеген, орындықтар, дәретхана орнатылған, шағын дәмхана жұмыс істей бастаған. Кейін жағажай қараусыз қалып, қазаншұңқырларда шомылуға тыйым салынды. Соған қарамастан адамдар мұнда келуді тоқтатпады. Күн ыстықта жасанды көлідң жағасында ине шаншыр орын болмайды.
Биыл мұнда, дәлірек айтқанда екінші және үшінші қазаншұңқырлардың жағалауында бой салып өскен алып ағаштарды қиыршық тас өндірушілер кесіп тастаған, ал бұрынғы жағажай бойындағы жол технологиялық трассаға айналды. Кейін мүлде қоршауға алынды. Бұл жағдай өскемендік әлеуметтік желі қолданушыларының наразылығын туғызды. «Қала шетіндегі жалғыз ыңғайлы шомылатын жер осы еді. Мұндағы су салыстырмалы түрде таза әрі жылы, ағыс жоқ, ал жағасы жайлы» деп жазды.
Байқауымызша, жергілікті билік қала тұрғындарының пікіріне құлақ асып, биыл жазда екінші қазаншұңыр маңындағы жағажайды абаттандыруға кірісті. Абаттандыру аясында жағалауға құм төселіп, жол салынды, автотұрақ жасалды және тағы басқа қажетті инфрақұрылымдар орнатылды. Сонымен қатар жағажай аумағында құтқару бекеті де пайда болды.
Алайда әзірге бұл жағажай шомылуға рұқсат етілген ресми орындар тізіміне енгізілген жоқ. Бүгінде мәселе шешімін күтіп тұр. Осыған байланысты жағалауда төтенше жағдайлар департаментінің қызметкерлері кезекшілік атқарып, жазатайым оқиғалардың алдын алуға назар аударған.
Осы айдың соңына дейін рұқсат құжаттарын толық аламыз. Қазір қазаншұңқыр маңындағы жағажайда судың сапасы, түбі және жағалау сызығының жағдайы зерттеліп жатыр. Барлық рұқсат құжаттары берілгеннен кейін бұл жер ресми түрде шомылуға рұқсат етілген орындар қатарына енгізіледі. Жағажай ресми түрде биыл ашылады деп жоспарлап отырмыз. Алайда барлық рәсімдік мәселелерді ескере отырып, жаңа жағажай тек келер жылғы шомылу маусымында толық бастайды, – деді Өскемен қаласы әкімінің орынбасары Абзал Мәулетханов.
