Зайсан ауданында минералды су өндіретін зауыт жұмыс істеп тұр. «Арна Минералс» зауытынан шығарылатын «Miglior» суына қазір сұраныс та жоғары, деп хабарлайды F16.kz.
Аталмыш компания бүгінде ауданның ғана емес, облыс экономикасының өркендеуіне үлес қосып отырған ірі кәсіпорындардың бірі.
Зауыт өнімдері еліміз бойынша ғана емес шет елдерде де танымал сауда маркасына айналды. Сұраныс жоғары болғандықтан су және сусындар өндіру саласындағы өндірісін кеңейту бағытында құны 2 млрд теңге болатын роботпен басқарылатын жабдықтар орнатылды. Көп ұзамай жұмысын бастайтын болады, — деді аудан әкімі Аэлита Ахметсәлімқызы Өңірлік коммуникациялар қызметі алаңында өткен баспасөз брифингінде.
Айта кетейік, аталмыш компания өңірдегі бірқатар жобаларға инвестор болып, қолдау көрсетіп келеді. Алдағы уақытта олардың бастамасы және демеушілігімен су электр станциясы мен жоғары қоспаланған болат өндіретін зауыт салу жоспарланып отыр.
