Шығыс Қазақстан облысында су тасқыны қаупі жоғары аймақтарға әуеден бақылау жүргізілді. Облыстық төтенше жағдайлар департаментінің қызметкерлері мен жергілікті атқарушы орган өкілдері тікұшақпен қары қалың, суы мол өңірлерді биіктен шолып, зерделеді, деп хабарлайды F16.kz.
Төтенше жағдайлар министрлігіне қарасты «Қазавиақұтқару» кәсіпорнының МИ-8 тікұшағына мінген мамандар Өскемен-Шемонаиха-Риддер-Глубокое-Өскемен бағытында әуеден бақылау жүргізді.
Облыстық ТЖД бастығының орынбасары Амангелді Еңсегеновтің айтуынша, шолу барысында таудағы қар мөлшері мен тасқын қаупі бар аумақтар назарға алынып, талдау жүргізілді. Атап айтқанда, Шемонаиха мен Глубокое аудандарында қардың қалыңдығы ескерілді.
Мамандар Үбі және Үлбі өзендерінде мұз ери бастағанын айтады. Өзендердің төменгі ағысында мұз толық ерігенмен, жоғарғы жағында енді ғана сөгіле бастаған. Әзірге мұз кептелісі болған жоқ.
Әуеден бақылау кезінде түсірілген фото және бейнематериалдарды талдау нәтижесінде өңірдегі су тасқыны жағдайы әзірге тұрақты екені анықталды.
Айта кету керек, мұндай шолу жыл сайын жүргізіледі. Бұл мамандарға гидрометеорологиялық үдерістердің өзгерісін бақылап, төтенше жағдайдың алдын алуға мүмкіндік береді.
