Өңірде көктемгі су тасқыны кезеңіне дайындық бойынша кешенді алдын алу шаралары жүргізіліп жатыр. Облыстық төтенше жағдайлар департаментінде тәулік бойы жұмыс істейтін жедел штаб құрылды, деп хабарлайды F16.kz.
Жедел штаб су тасқыны жағдайына тұрақты мониторинг жүргізіп, тиісті қызметтердің жұмысын үйлестіреді.
Жағдай күрделене түссе әрекет ету үшін 3677 адамнан тұратын азаматтық қорғау күштері дайындалған. Сонымен қатар 556 техника, 75 жүзу құралы және 234 мотопомпа жұмылдырылмақ.
Халықты эвакуациялау және күштерді жедел жеткізу үшін Ми-8 және Ми-2 тікұшақтарын қоса алғанда, 11 әуе кемесі тұрақты дайындықта тұр.
Облыстық төтенше жағдайлар департаменті ұсынған ақпаратқа сүйенсек, жыл басынан бері Үлкен Нарын, Самар, Алтай, Катонқарағай және Ұлан аудандарында су тасқыны қаупі бар учаскелерге үш рет әуеден бақылау жүргізілген. Зерттеу нәтижелері көрсеткендей, аумақта әлі де қар қалың. Бұқтырма өзені толықтай мұз құрсауында, кей жерлерде ғана ойықтар байқалады.
Жуықта ТЖД мамандары жергілікті атқарушы органдармен бірлесіп Алтай ауданы мен Риддер қаласындағы су тасқыны қаупі бар учаскелерді тексеріп, қорғаныс құрылыстары мен елді мекендердің дайындығын бағалады.
Келесі әуеден бақылау ертең Марқакөл, Тарбағатай және Зайсан аудандарында жүргізілмек.
Зайсан, Шемонаиха, Тарбағатай және Нарын аудандарында қардың қалыңдығы көпжылдық орташа көрсеткіштен жоғары. Қазіргі уақытта облыс өзендеріндегі гидрологиялық жағдай тұрақты, су деңгейі қауіпті межеден төмен, — делінген «Қазгидромет» РМК мәліметінде.
Қазіргі уақытта су өткізу құбырларының 58%-ы және көпірлердің 71,6%-ы тазартылды. Бұл жұмыстарды 20 наурызға дейін аяқтау жоспарланған. Еріген қар суларын өткізу үшін инертті материалдар, құм салынған қаптар мен құрал-жабдықтар дайындалған.
Өткен дүйсенбіде Тарбағатай ауданындағы «М-38 Омбы-Майқапшағай-Шілікті-Ақжар» облыстық жолында еріген қар суы жол үстінен асып өтті. Алайда, жолды шайып кетуге жол берілмей, көлік қозғалысы қамтамасыз етілген.
Айта кету керек, облыстағы автокөлік жолдарының жалпы ұзындығы 5,2 мың шақырымды құрайды. Онда төрт мыңға жуық су өткізу құбыры және 250-ден астам көпір бар.
Аймақ басшысы Нұрымбет Сақтағанов су тасқынына дайындық бойынша алдын алу шараларын күшейтуді тапсырды.
