Шығыс Қазақстан облысының бірнеше ауданында тасқын қаупі әлі де жоғары. Алтай ауданында тілсіз жауды алдын алуға Қ.Қайсенов атындағы 68303 әскери бөлімінің екінші құтқару батальоны жұмылдырылды, деп хабарлайды F16.kz.
Жеке құрам 12 наурыздан бастап Алтай ауданының Тұрғысын, Чапаев, Малеевка, Соловьево, Маяк ауылдарында, Зубовка кенті мен Алтай қаласында су тасқынының алдын алу бойынша жұмыс атқарды.
Батальон күшімен жалпы ұзындығы 4905 метр арық, алты көпір, екі канал, 27 су өткізу құбыры қар мен мұздан тазартылды. 1220 қап инертті материалмен толтырылды. Зубовка кентіндегі Бұқтырма өзенінің бөгеті қаптармен бекітілді. Сонымен қатар су тасқыны қаупі бар елді мекендердің тұрғындарымен профилактикалық жұмыс жүргізілді, — деп хабарлады ШҚО ТЖД баспасөз қызметі.
Алтай ауданының әкімі Ренат Құрмамбаев 2-құтқару батальонының жеке құрамына алғыс хат табыстап, тұрғындармен бірге ауданның қауіпсіздігін қамтамасыз етіп, халықты су тасқыны қаупінен қорғауға қосқан үлестері үшін ризашылық білдірді.
