Тарбағатай ауданының Жаңауыл мен Құйған ауылдарында осыдан екі жыл бұрын басталған ауызсу жүйесі желілерін жаңғырту жұмыстары қашан аяқталады? Бүгін өткен Шығыс Қазақстан облысы мәслихатының кезекті ХХІІ сессиясында депутаттар тарапынан осы мәселеге де қатысты сауал жолданды, деп хабарлайды F16.kz.
Еске салайық, шекаралық аймақ саналатын Тарбағатай ауданының Құйған мен Жаңауыл ауылдарындағы ауызсу жүйесі желілерін қайта жаңғырту жұмыстары 2023 жылы басталған болатын. Amanat партиясының Жол картасы бойынша бұл бағыттағы іс-шаралар 2024 жылдың соңына дейін аяқталып қоюы керек еді. Алайда, су құбырларын жаңарту жұмыстары күні бүгінге дейін бітпеген. Халық қалаулылары қазір құрылыс жұмыстары мүлде тоқтап тұрғанын айтады. Бәрінен бұрын жұмыстың тұралап қалуы жергілікті халыққа ауыр тиюде.
Ал облыстық Энергетика және тұрғын үй-коммуналдық шаруашылық басқармасынан хабарлағандай, қазір бар мәселе қаржыға келіп тіреліп тұр. Құзырлы органдағылар тамыз айында қажетті сомадағы қаражат бөлінгеннен кейін, құрылыс жұмыстары жанданатынын мәлім етті.
– Бұл жобаларды жыл соңына дейін аяқтайтын боламыз, – деп сендірді басқармадағылар.
Мәселені мәслихат сессиясына қатысқан Шығыс Қазақстан облысы әкімінің бірінші орынбасары Жақсылық Омар өз бақылауына алатынын жеткізді.
