Тарбағатай ауданында ақтаңгер ақын Абаш Кәкеновтің 70 жылдық мерейтойына орай облыстық ақындар айтысы өтеді. Суырыпсалма өнердің кіл мықтылары сынға түсетін сөз сайысы Ақжар ауылының Қабанбай батыр саябағында болады, деп хабарлайды F16.kz.
Өнер бәсекесіне облыстың әр өңірінен танымал айтыскер ақындар қатысып, көрерменге құнарлы ой, сүбелі сөзден шашу шашпақ. Ұлт руханиятын ұлықтайтын шарада ақындар елдік мәселелерді, ұлттық құндылықтарды және қоғамдағы өзекті тақырыптарды жырға қосады.
Ұйымдастырушылардың айтуынша, бұл мәдени басқосу айтыс өнерін насихаттап қана қоймай, жас ұрпақтың ұлттық мұраға деген қызығушылығын арттыра түспек. Сонымен қатар мерейтойлық кеш барысында Абаш Кәкеновтің шығармашылығы мен қазақ айтыс өнеріне қосқан еңбегі кеңінен насихатталады.
Қазақ айтыс өнерінің көрнекті өкілі Абаш Кәкеновтің мерейтойына арналған жыр додасы 17 мамыр күні сағат 14.00-де Ақжар ауылының Қабанбай батыр саябағында өтеді, Кіру — тегін.
