Биылғы тоғыз айда өңір тұрғындары арасында құтырма және сібір жарасы ауруларын жұқтырған жағдайлар болған жоқ. Алайда Тарбағатай ауданында ірі қара малдан құтырма ауруы анықталды. Бұл туралы ШҚО бойынша санитариялық-эпидемиологиялық бақылау департаменті басшысының орынбасары Сәуле Слямғазина айтып берді, деп хабарлайды F16.kz.
Тарбағатайда аталған аурудың белгілері ірі қара мен иттен табылған. Мамандардың айтуынша, әзірге басқа деректер тіркеле қоймаған. Десе де жұқпалы аурудың алдын алу үшін ошақ анықталған жердегі тұрғындар түгел екпе алды.
Аурудың алдын алу мақсатында жүйелі жұмыстар жүргізіп жатырмыз. Бірақ екпеден бас тарту жағдайлары әлі де кездесеті. Атап айтқанда, Марқакөл, Глубокое, Тарбағатай аудандары мен Риддерде тіркелді. Ауру жұқтыру қаупі жоғары санатқа ветеринарлар, аңшылар, орман қызметкерлері мен зертхана мамандары кіреді. Биыл бұл санаттағы 478 адам екпе алды, — деді Сәуле Слямғазина өңірлік коммуникациялар қызметі алаңында өткен баспасөз мәслихатында.
Ал бруцеллез 18 тұрғында, оның ішінде бір жасөспірімде анықталған. Бұл былтырғы сәйкес мерзімімен салыстырғанда 40%-ға төмен.
Жалпы 17 індет ошағы тіркеліп, байланыста болған 46 адам тексерілді. Нәтижесінде бір адамнан ауру анықталды. Бруцеллез жұқтыру деректерінің басым бөлігі (88,9%) ауыл шаруашылығы жануарларынан, соның ішінде ірі қара малдан тараған, — деді департамент өкілі.
Облыста сібір жарасы деректері тіркелген жоқ. Дегенмен де алдын алу шаралары жүргізіліп отырады. Мәселен, жыл басынан бері сібір жарасына қарсы 385 адамға екпе салынған.
Айта кетейік, облыста сібір жарасының 101 топырақ ошағы бар. Бұл жерлерді шаруашылық мақсатта пайдалануға қатаң түрде тыйым салынған.
