Шығыс Қазақстан облысында 16 сәуір мен 30 мамыр аралығында өткізілген республикалық «Нерест» жедел-профилактикалық іс-шарасы аяқталды. ШҚО ПД табиғатты қорғау полициясының қызметкерлері уәкілетті мемлекеттік органдармен бірлесіп, балық уылдырық шашатын орындарды, су айдындарының жағалауларын және көлік бағыттарын қамтитын кешенді рейдтік шараларды жүзеге асырды, деп хабарлайды F16.kz.
Іс-шараның негізгі мақсаты – су биологиялық ресурстарын заңсыз аулау, тасымалдау және сатуға байланысты құқық бұзушылықтардың алдын алу, анықтау және жолын кесу, сондай-ақ экологиялық қылмыстарға тосқауыл қою.
Тарбағатай ауданында Зайсан көлінің жағалауында заңсыз балық аулаумен айналысқан 32 жастағы жергілікті тұрғын ұсталды. Тексеру барысында одан моторлы қайық пен 55 келіге жуық көксерке балығы тәркіленді. Қазіргі уақытта аталған факті бойынша сотқа дейінгі тергеп-тексеру жүргізіліп жатыр, — дейді ШҚО ПД баспасөз қызметі.
Профилактикалық шара барысында барлығы 100-ден астам рейдтік іс-шара жүргізіліп, ҚР Әкімшілік құқық бұзушылық туралы кодексінің 383-бабына сәйкес 85 әкімшілік құқық бұзушылық анықталды. Сонымен қатар, балық ресурстарын заңсыз аулауға және олардың айналымына байланысты 3 қылмыстық іс тіркелген.
