Тарбағатай ауданының орталығы Ақжар ауылындағы балалар саз мектебі жас таланттардың өнерін шыңдап, шығармашылық қабілетін дамытуға елеулі үлес қосып келеді. Қазір бұл білім ордасында 260 оқушы білім алып, жеті түрлі бағыт бойынша өнер үйреніп жүр, деп хабарлайды F16.kz.
Мектепте оқушылар домбыра, қобыз, жетіген, баян секілді ұлттық және классикалық музыкалық аспаптарда ойнауды меңгереді. Сонымен қатар вокал және хореография бағыттары да жұмыс істейді. Мұндағы басты мақсат – балалардың шығармашылық қабілетін ашу, эстетикалық талғамын қалыптастыру және өнерге деген сүйіспеншілігін арттыру.
Ақжар балалар саз мектебінің директоры Ажар Қабатаеваның айтуынша, ұстаздар әр баланың бойындағы дарынды байқап, оны әрі қарай дамытуға ерекше көңіл бөледі.
Біз әр оқушының қабілетін ескеріп, оның шығармашылығын дамытуға жағдай жасаймыз. Балалардың өнерін шыңдау үшін ансамбльдер мен оркестрлерде дайындықтар өткізіледі. Сонымен қатар шығармашылық кештер, мерекелік концерттер мен аудан көлемінде ұйымдастырылатын түрлі шараларға қатысамыз. Бұл оқушылардың сахна тәжірибесін арттырып, өз-өзіне деген сенімділігін нығайтуға көмектеседі, – дейді мектеп директоры.
Айта кетейік, саз мектебінің тәрбиеленушілері аудандық, облыстық және республикалық байқауларға тұрақты түрде қатысып, жүлделі орындарды иеленіп жүр. Бұл – мектеп ұжымының жүйелі жұмысы мен оқушылардың өнерге деген қызығушылығының айқын нәтижесі.
Қазіргі таңда Ақжар балалар саз мектебі Тарбағатай өңіріндегі өнерлі жастарды тәрбиелеп отырған маңызды мәдени білім беру орталықтарының біріне айналып отыр.
