Қазақстанда Atamnyn аmanaty қоғамдық бірлестігі кейінгі алты жылда Екінші дүниежүзілік соғыс жылдарында қаза тапқан және хабар-ошарсыз кеткен қазақстандық сарбаздардың тағдырын анықтау бағытында ауқымды жұмыс жүргізіп келеді. Ұйымның негізгі мақсаты – тарихи жадыны жаңғырту, ұрпақтар сабақтастығын нығайту және жастар арасында патриоттық құндылықтарды қалыптастыру.
4,5 МЫҢНАН АСТАМ ҚАЗАҚСТАНДЫҚ ЖАУЫНГЕР ТУРАЛЫ АҚПАРАТ ТАБЫЛДЫ
Қазір бірлестікке 12 мыңнан астам өтінім түсіп, 4,5 мыңнан астам қазақстандық жауынгердің тағдыры мен жерленген орындары анықталған. Іздестіру жұмыстарының нәтижесінде ай сайын бұрын белгісіз болған 40-50 сарбаздың есімі елге қайтарылады. Сонымен қатар, Қазақстан Республикасының Қорғаныс министрлігі қолдауымен 23 майдангердің сүйегі елге жеткізіліп, әскери құрметпен қайта жерленген.
Іздестіру жұмыстарын кеңейту мақсатында ұйым 200-ден астам халықаралық және республикалық келісімдерге қол қойған. Арнайы интернет-портал, жедел желі және әлеуметтік желілер арқылы азаматтар өз туыстарын тегін іздеуге өтінім бере алады.
ЖАСТАРҒА БАҒЫТТАЛҒАН ЖОБАЛАР
Бірлестік тек іздестірумен шектелмей, жастар арасында әскери-патриоттық тәрбиені де белсенді жүргізіп келеді. Түрлі конференциялар, дөңгелек үстелдер, квесттер мен спорттық шаралар ұйымдастырылып, бұл бастамаларға 2 миллионнан астам адам қатысқан.
Сондай-ақ қазақстандық іздестірушілер Ресейдегі халықаралық әскери-тарихи экспедицияларға тұрақты түрде қатысып, майдан далаларында зерттеу жұмысын жүргізеді.
ШЕТЕЛДІК ДЕРЕКҚОРЛАРҒА ТӘУЕЛДІЛІКТЕН АРЫЛУ КЕРЕК
Сарапшылардың айтуынша, Қазақстанда Екінші дүниежүзілік соғысқа қатысушылар туралы бірыңғай ұлттық дерекқор әлі толық қалыптаспаған. Қазір зерттеушілер шетелдік базаларға тәуелді. Осыған байланысты ұйым қазақстандық электронды дерекқор құруды ұсынады. Бұл бастама барлық жауынгерлер туралы нақты әрі толық мәлімет жинауға мүмкіндік береді.
Сонымен қатар Батыс Қазақстан аумағында орналасқан майдан маңы жерлерін зерттеу, бауырластар зираттарын анықтау және эвакуациялық госпитальдарда қаза тапқандардың деректерін қалпына келтіру мәселелері де күн тәртібінде тұр.
Ұйым Еуропа елдерінде қаза тапқан қазақстандықтардың есімін анықтауға да ерекше назар аударып отыр. Сарапшылардың пікірінше, бұл бастамалар тарихи әділеттілікті қалпына келтіріп қана қоймай, елдің халықаралық беделін арттыруға да ықпал етеді.
Жалпы, атқарылып жатқан жұмыстар – өткенге тағзым ғана емес, болашақ ұрпаққа аманат. Себебі тарихи жадыны сақтау – ұлттың тұтастығы мен рухани негізінің басты тіректерінің бірі.
