Шығысқазақстандық тәртіп сақшылары Отбасы күнін ерекше атап өтті. Бұл күні Арбатта ел тыныштығын күзететін тәртіп сақшыларының отбасы жиналып, мерекелік шараның куәсі болды, деп хабарлайды F16.kz.
Шараның негізгі ерекшелігі — ашық аспан астында ұйымдастырылған фотокөрме болды. Биыл Отбасы күнінде полиция қызметін ұрпақтан-ұрпаққа мирас еткен әулеттерге ерекше көңіл бөлініп, олардың фотосуреттері мен өмірбаяндары көрмеге қойылған.
Бұл арқылы біз заңға адал қызмет етуді ғана емес, осы дәстүрді отбасында да сақтап, ұрпаққа жалғастырған әулеттерді құрметтейміз. Әрбір әулет – адалдықтың, батылдық пен антқа беріктіктің үлгісі. Олардың өмір жолы – полицияның болашағын қалыптастыратын берік негіз, – деді ШҚО ПД бастығының орынбасары, полиция полковнигі Серік Манапов.
Салтанатты кеште тұрғындарға әулеттердің тарихы кеңінен таныстырылды. Қалалықтар алғаш болып полиция формасын киген ардагерлердің, олардың ізін жалғаған ұрпақтарының әсерлі әңгімелерін тыңдады.
Кеш соңында «Ашық микрофон» алаңында қала тұрғындары жақындары жайлы естеліктерімен бөлісіп, алғыс айтып, жүрекжарды тілектерін жеткізді.
