Шығыс Қазақстан облысында су тасқыны қаупі жоғары ауақтарға Төтенше жағдайлар министрлігіне қарасты «Қазавиақұтқару» АҚ тікұшағымен әуеден барлау жүргізілді, деп хабарлайды F16.kz.
Әуеден шолу жүргізуге ШҚО ТЖД, «Қазселденқорғау» облыстық филиалы, Ертіс бассейндік су инспекциясы және «Қазгидромет» мамандары қатысты. Арнайы топ қар көшкінінің қаупі мен гидрологиялық жағдайды бағалады. Әуе маршруты Өскемен-Алтай-Үлкен Нарын-Катонқарағай бағытында өтті.
Нәтижесінде таулы аймақтарда көшкін жүрмегені, бірақ қар жамылғысы қалың екені байқалды.
Бұқтырма өзенін әлі де мұз құрсап жатқаны көрінді. Өзеннің жағалауы аздап еріген, орталық бөлігінде ойықтар бар. Жалпы гидрологиялық жағдай тұрақты. Мамандар өңірдегі ахуалға мониторинг жүргізу жалғасатынын атап өтті.
