Шығыс Қазақстан облысында төтенше жағдай қызметінің жедел әрекеті арқасында орман өрті оқшауланып, жағдай бақылауға алынды. Оқиға Ұлан ауданынның Приморск орманшылығы аумағында болған, деп хабарлайды F16.kz.
ШҚО ТЖД баспасөз қызметінің мәліметінше, өрт Аюда шатқалындағы құрғақ шөп пен бұта-қарағанның тұтануынан басталған. Өрт шыққан аймақтың тау-тасты болып келуі және желдің күшеюі төтенше жағдай қызметкерлерінің жұмысын айтарлықтай қиындатты. Тілсіз жаумен күреске Төтенше жағдайлар министрлігі авиациясының тікұшағы жұмылдырылып, әуеден су төкті. Сонымен қатар орман шаруашылығы қызметкерлері мен облыстық төтенше жағдайлар департаментінің жеке құрамы тартылды. Барлығы бірлесіп, үйлесімді әрекет етті.
«Казавиаспас» тікұшағы арқылы өрт ошағына әуеден жеті рет су төгілді, оған шамамен 21 тонна су пайдаланылған. Нәтижесінде негізгі ошақ оқшауланып, өрттің таралуы шектелді.
Қазір бірлескен күштердің арқасында өрт толық оқшауланды. Ашық өрт ошақтары тіркелген жоқ, жағдай тұрақты әрі бақылауда. Өрттің шығу себептері анықталып жатыр. Тиісті қызметтер тексеру жұмысына кірксен.
Төтенше жағдайлар қызметі тұрғындарға табиғат аясында өрт қауіпсіздігі талаптарын қатаң сақтауды ескертеді. Әсіресе, құрғақ кезеңде отты дұрыс қолданбау үлкен өртке әкелуі мүмкін.
