Тәуелсіздік күні мерекесіне орай Өскемендегі Оралхан Бөкей кітапханасында мазмұнды кеш өтті. Қалалық ардагерлер кеңесінің бастамасымен ұйымдастырылған «Белсенді қоғам – өркенді өмір кепілі» атты кездесуге 1986 жылғы Желтоқсан оқиғасының қатысушылары шақырылды, деп хабарлайды F16.kz.
Кездесудің басты мақсаты – қоғамдағы ұрпақ сабақтастығын нығайту, жастардың азаматтық ұстанымын қалыптастыру және ел тарихындағы маңызды кезеңдердің ұмыт қалмауына ықпал ету. Жиын барысында тәуелсіздікке жол ашқан Желтоқсан оқиғасының тарихи мәні, сол кезеңдегі жастардың ерлігі мен қайсарлығы кеңінен сөз болды.
Шараға қатысқан Өскемен қалалық ішкі саясат бөлімінің басшысы Ринат Ахметжанов мұндай кездесулердің тәрбиелік мәніне ерекше тоқталды. Оның айтуынша, аға буын өкілдерінің өмір жолы мен ел үшін атқарған қызметі – жас ұрпаққа үлгі.
Баршаңызды еліміздің ең қастерлі мерекелерінің бірі – Тәуелсіздік күнімен шын жүректен құттықтаймын. Аға буынның жүріп өткен жолы – кейінгі ұрпақ үшін баға жетпес өнеге. Сіздердің ерліктеріңіз бен табандылықтарыңыздың арқасында біз бүгін еркін елде өмір сүріп отырмыз. Сол үшін баршаңызға зор алғыс білдіремін, – деді ол.
Кездесуге арнайы шақырылған желтоқсаншылар сол бір тарихи кезеңдегі оқиғаларды еске алып, естеліктерімен бөлісті. Олар сол уақыттағы қиындықтар мен әділетсіздіктерге қарамастан, жастардың ел болашағы үшін күрескенін атап өтті. Сонымен қатар бұл оқиғаның Қазақстанның тәуелсіз мемлекет ретінде қалыптасуындағы рөліне тоқталды.
«Желтоқсан – 86» қоғамдық бірлестігінің төрағасы Марат Рамазанов желтоқсаншыларға көрсетіліп жатқан құрметке ризашылығын білдіріп, Тәуелсіздік мерекесінің маңызын ерекше атап өтті.
Бүгінгі таңда желтоқсаншылар мен ардагерлерге айрықша көңіл бөлініп жатқаны қуантады. Тәуелсіздік күні алдағы уақытта да кең көлемде, жоғары деңгейде аталып өте берсе екен дейміз. Ата-бабамыз сан ғасыр бойы аңсаған азаттығымыз мәңгі жасасын, – деді ол.
Кездесу соңында мектеп оқушылары елге, Отанға деген сүйіспеншілікті дәріптейтін патриоттық әндер орындап, жүрек тебірентер өлең жолдарын оқыды. Жас ұрпақтың өнері мен құрметі жиынға қатысушыларға ерекше әсер қалдырып, шараның мазмұнын одан әрі байыта түсті.
