Бүгін «Таза Қазақстан» бағдарламасы аясында өңір тұрғындарының экологиялық мәдениетін көтеруге бағытталған ауқымды қоғамдық кездесу өтті. Жиында тазалықты сақтау, тұрмыстық қалдықтарды дұрыс басқару және табиғатқа жауапкершілікпен қарау жөніндегі бастамалар талқыланды. деп хабарлайды F16.kz.
Спикерлер – қоғамдық кеңес мүшесі Ернар Үсенов пен экобелсенді Аружан Аймишова экология бағытында атқарылып жатқан жұмыстардың нәтижесі туралы айтып, ортақ іске қоғамның атсалысуы маңызды екенін атап өтті. Кездесу барысында жыл басынан бері жүзеге асқан негізгі нәтижелер таныстырылды. Соның ішінде:
• 200-ден астам экологиялық акция өткізілді;
• 500 тоннадан астам қоқыс жиналды;
• 11 мыңнан астам ағаш және 46 мың түп гүл отырғызылды;
• тұрғындар мен жастар арасында кең көлемді ақпараттық-түсіндіру жұмыстары жүргізілді.
Экологиялық шаралар тақырыбы ел деңгейіндегі бастамалармен де сабақтасып отыр. Биыл 21 сәуірде өткен «Таза Қазақстан» экологиялық фестивалінде сөйлеген сөзінде Президент Қасым-Жомарт Тоқаев бұл акция бір күндік науқан болмауға тиіс екенін, керісінше, әрбір қазақстандықтың күнделікті өмір салтына айналуы қажеттігін айтқан. Қоғамдық бастамалардың белсенділігі дәл осы міндетке бағытталғанын спикерлер де тілге тиек етті.
Тұрғындар жиын барысында өз ұсыныстарын айтып, қаланы абаттандыру мен экологиялық бастамаларды жалғастыруға қатысты сұрақтар қойды. Қоғамдық кездесу өңірде экологиялық мәдениетті нығайтуға және қоршаған ортаға деген жауапкершілікті арттыруға серпін берді.
