Бүгін таңертеңнен «Таза Өскемен» коммуналдық мекемесінің барлық қызметі күшейтілген режимде жұмыс істеп жатыр. Синоптиктердің болжамы бойынша, толассыз жауған қар кешке дейін тоқтамауы мүмкін, деп хабарлайды F16.kz.
Қазір арнайы техникалар қаланың негізгі көшелерін, көпірлер мен аялдама кешендерін, жаяу адам жүретін жолдарды қардан тазалап жатыр. Коммуналдық мекеме мамандарының айтуынша, бір мезетте қаланың барлық ауданын тазалау мүмкін емес, өйткені қар тоқтаусыз жауып тұр. Маңызды магистральдар мен адамдар көп шоғырланатын аумақтарға бірінші кезекте көңіл бөлінген. Дегенмен жұмыс қарқынды, бір сәт тоқтамайды. Күрелген жолға дереу көктайғаққа қарсы материал төгу жұмысы да ұйымдастырылған. Жиналған қар жүк көліктеріне тиеліп, қала сыртына шығарыла бастады.
Егер қандай да бір сұрақтар туындаса немесе белгілі бір учаскеге назар аудару қажет болса, қала тұрғындары тікелей диспетчерлік қызметке мына телефон нөмірлері арқылы хабарласа алады: 8 (7232) 53 25 77, 8 777 331 85 36.
Бұл ақпаратты жедел бригадаларға жеткізіп, мәселені жылдам шешуге мүмкіндік береді. Ауа райының қолайсыздығына байланысты тұрғындар алыс жолға шығудан бас тартып, көлікпен немесе жаяу жүргенде сақ болғаны абзал.
