Шығыс Қазақстан облысында әлеуметтік желіде ұлтаралық араздықты қоздыруға бағытталған материалдар таратты деген күдікпен азамат ұсталды. Бұл туралы облыстық полиция департаментінің баспасөз қызметі мәлім етті, деп хабарлайды F16.kz.
Тергеу материалдарына сәйкес, Өскемен тұрғыны TikTok желісінде тікелей эфир өткізіп, онда ұлтты қорлайтын және балағат сөздер айтқан. Аталған жағдай бойынша жергілікті тұрғын полицияға шағым түсіріп, тиісті шара қабылдауды сұраған.
Құқық қорғау органдарының дерегінше, 35 жастағы ер адам бірнеше аккаунт арқылы онлайн трансляция жүргізген. Олардың бір бөлігі кейін жойылған. Эфирлер «батл» форматында өтіп, өзге қолданушылардың қатысуымен ұйымдастырылған. Алдын ала мәлімет бойынша, ол трансляция кезінде алкогольді ішімдіктен масайып, әртүрлі этнос өкілдеріне қатысты дөрекі және кемсітушілік сипаттағы сөздер айтқан.
Жүргізілген психология-филологиялық сараптама қорытындысы бойынша жарияланған материалдарда ұлтаралық араздықты қоздыру белгілері бар екені анықталған. Аталған оқиға бойынша күдікті уақытша ұстау изоляторына қамалды. Қазір сотқа дейінгі тергеу амалдары жүргізіліп жатыр.
ШҚО полиция департаменті интернетте, соның ішінде әлеуметтік желілерде арандатушылық сипаттағы және қорлайтын мазмұндағы жазбалар тарату заң аясында қатаң жазаланатынын ескертеді.
