Денсаулық сақтау министрлігі зейнетақы жинағын медициналық қызметтерге қолдану тәртібіне өзгеріс енгізуді ұсынып отыр. Жоба «Ашық НҚА» порталында жарияланды, деп хабарлайды F16.kz.
Министрлік әзірлеген жаңа құжатқа сәйкес, «Емделу үшін біржолғы зейнетақы төлемдерін пайдалану қағидаларына» өзгерістер енгізіледі. Атап айтқанда, тісті имплантациялау мен протездеу сияқты стоматологиялық қызмет түрлерін зейнетақы жинағы есебінен төлеу мүмкіндігін алып тастау жоспарланған.
Ведомствоның мәліметінше, мұндай шара зейнетақы қорындағы қаражаттың мақсатсыз жұмсалуын болдырмауға бағытталған.
Бұйрық жобасы қазір қоғамдық талқылауға шығарылған, ол 30 қыркүйекке дейін жалғасады.
Еске салсақ, бұған дейін азаматтар тіс емдеуге Бірыңғай жинақтаушы зейнетақы қорынан 757 млрд теңгеге жуық қаражат пайдаланған. Сонымен қатар, 200 млрд теңге көлеміндегі қаржы жалған стоматологиялық қызмет көрсету арқылы заңсыз алынғаны анықталған. Осыған байланысты 15 қыркүйектен бастап стоматология саласына қатысты жаңа өтінімдерді қабылдау уақытша тоқтатылған еді.
