Конституцияның 30 жылдығы мен Қала күні мерекесінде «Торпедо» хоккей клубының ойыншылары өскемендіктерге тамаша тарту жасады. «Титан қаланың» қаһармандары Қазақстан кубогын жеңіп алып, өз мықтылықтарын тағы бір мәрте дәлелдеді, деп хабарлайды F16.kz.
Ел кубогының финалы 29 тамыз күні кешке Қарағанды қаласында өтті. Шешуші сында «Торпедо» хоккейшілері жергілікті «Сарыарқамен» ойнады. Қос мықты арасында өткен матч аса тартысты өрбіді деуге келмейді. Өскемендік команда ойын тізгінін бірден өз қолына алып, қарсыласына еш мүмкіндік бермеді. Нәтижесінде «Торпедо» ойыншылары мұз айдыны иелерін 4:1 есебімен ойсырата жеңіп, кубок иегері атанды.
Шығыс Қазақстан облысының әкімі Нұрымбет Сақтағанов бұл жеңіс қос мерекені қатар атап өтіп жатқан өңір тұрғындарына үлкен сый болды деп атап өтті.
Бұл жеңіс Қазақстан Республикасы Конституциясы күні қарсаңында өте символдық мәнге ие. Спортшыларымызға алдағы уақытта да жаңа жеңістер тілеймін, – деді аймақ басшысы.
