Республика күніне орай Шығыс Қазақстан облысында ауқымды мәдени іс-шаралар жоспарланып отыр. Олардың басым бөлігі Өскеменнің адам аяғы көп жүретін көрікті орындарында өтеді, деп хабарлайды F16.kz.
Облыстық мәдениет және мемлекеттік шығармашылық тапсырыс бөлімінің басшысы Ләззат Жұмашеваның мәлімдеуінше, бұл күндері қаладағы АДК–River, «Император», Maxi Mall, «Алтай» көтерме-бөлшек сауда орталығы, Арбат, Қайсенов атындағы саябақ және басқа жерлер думанды кештің орталығына айналады.
Мәселен, Maxi Mall сауда үйінде Байжігіт атындағы қазақ халық аспаптар оркестрі мен «Әлем сазы» вокалды-аспаптық ансамблі әуелетіп ән салып, күмбірлетіп күй төгеді. Сондай-ақ мұнда өнер музейінің «Бабалар рухы» атты көрмесі ашылып, облыстық драма және оперетта театрының «Рухы биік – Республика» концерт-спектаклі көрерменге жол тартады.
«Алтай» көтерме-бөлшек сауда орталығында облыстық филармонияның «Алтай» фольклорлық-этнографиялық ансамблі «Бабалар мекені Алтай» атты концертін ұсынады.
Арбатта екі көрме өтеді: «Шығыс Қазақстан облысы табиғаты» және «Күмістің сиқыры мен жарқылы». Онда өңір музейлерінің қорынан алынған бірегей жәдігерлер жұртшылық назарына ұсынылады.
«Император» сауда үйінде облыстық кітапханалар «Мәңгілік ел – мәңгілік Республика» атты танымдық-мәдени кеш болады.
Ал ерекше тарту – «Оқырман трамвай» атты шығармашылық акция болмақ. №3 бағыттағы трамвайда Республика күніне арналған әдеби оқулар мен поэтикалық кездесулер өтеді. Мерекелік алаңдар күні бойы жұмыс істейді.
— Ондағы басты мақсат – ел бірлігін бекемдеп, ұлттық рух пен мәдени құндылықтарды дәріптеу, тәуелсіз Қазақстанның абыройын асқақтату. Бұл күндері Өскемен тұрғындары мен қонақтарына мазмұны бай, әсерлі мәдени бағдарлама ұсынады, – деді Ләззат Жұмашева.
