Шығыс Қазақстан облысында сыбайлас жемқорлыққа қарсы жаңа саясатты қалыптастыру мәселелеріне арналған кеңес өтті. Жиынға Мемлекеттік қызмет істері агенттігі облыстық департаментінің басшысы Ержан Айқымбеков төрағалық етті, деп хабарлайды F16.kz.
Кездесу барысында қатысушылар 2022–2026 жылдарға арналған қолданыстағы сыбайлас жемқорлыққа қарсы саясат тұжырымдамасының орнына келетін жаңа бағдарламалық құжатты әзірлеудің негізгі тәсілдерін талқылады. Бұл құжат мемлекеттік басқару жүйесін жаңғырту аясындағы жұмыстың заңды жалғасы болмақ.
Кеңесті ашқан Ержан Айқымбеков биыл қолданыстағы тұжырымдаманың жүзеге асу мерзімі аяқталатынын атап өтті.
Биыл 2022–2026 жылдарға арналған сыбайлас жемқорлыққа қарсы саясат тұжырымдамасын іске асыру мерзімі аяқталады. Осыған байланысты агенттік жаңа бағдарламалық құжатты әзірлеу жұмысын бастап кетті. Бұл құжат осыған дейін атқарылған жұмыстың заңды жалғасы болмақ, – деп атап өтті ол.
Жаңа саясаттың басым бағыттарының бірі – сыбайлас жемқорлыққа қарсы мәдениетті қалыптастыру тәсілдерін түбегейлі өзгерту және жемқорлық тәуекелдерін болдырмайтын орта құру. Бұл үшін ағартушылық жұмысты кеңейту, мақсатты білім беру бағдарламаларын енгізу, сондай-ақ цифрлық шешімдер мен жасанды интеллект технологияларын кеңінен пайдалану көзделіп отыр.
Облыстық цифрландыру және архивтер басқармасы басшысының орынбасары Еламан Мұхтарханов бірыңғай цифрлық ортасын қалыптастыру қажеттігін айтты.
Мемлекеттік органдар мен оларға қарасты ұйымдардың өзара іс-қимылына арналған бірыңғай цифрлық ортаны қалыптастыру жұмысын жалғастыру қажет. Ол үшін ақпараттық жүйелерді біріктіру және деректермен нақты уақыт режимінде алмасуды жолға қою маңызды. Сонымен қатар екінші бағыт ретінде деректерді бір рет енгізу қағидатын енгізу көзделіп отыр. Яғни мемлекеттік базада бұрыннан бар мәліметтер қайта сұратылмай, ведомствоаралық өзара әрекеттесу аясында пайдаланылуға тиіс, – деді Еламан Мұхтарханов.
Жиында мемлекеттік қызметтер көрсетудің бірыңғай цифрлық стандартын дамыту, процестердің орындалуын толық бақылау және деректерді талдау мәселелері де сөз болды. Мұндай шаралар басқарушылық шешімдердің сапасын арттырып, әкімшілік кедергілерді азайтуға мүмкіндік береді.
Кеңесте тұрмыстық сыбайлас жемқорлық мәселесіне де ерекше назар аударылды. Қатысушылар бұл құбылыстың алдын алу шараларын жүйелі түрде күшейту, сондай-ақ оның ұғымын заңнамалық тұрғыда бекіту қажеттігін айтты. Бұдан бөлек, құқық бұзу жағдайлары туралы хабарлаған азаматтарды қорғауды күшейту және комплаенс-қызметтердің жұмысын жетілдіру мәселелері көтерілді.
Бүгін мемлекеттік сектор мен квазимемлекеттік саладағы сыбайлас жемқорлық тәуекелдері және басқа да өзекті мәселелер талқыланып, мамандар өзара пікір алмасты. Жиынға қатысқандардың барлығы диалогқа белсенді түрде атсалысты. Кеңесте айтылған және алдағы уақытта жазбаша түрде ұсынылатын бастамалар жинақталып, әрі қарай қарап, сыбайлас жемқорлыққа қарсы саясат тұжырымдамасына енгізу үшін Мемлекеттік қызмет істері агенттігіне жолданады, – деп түйді Ержан Айқымбеков.
Департамент басшысының айтуынша, жаңа тұжырымдама қоғамның әділдікке деген сұранысын ескеріп, «Әділетті Қазақстан», «Адал азамат» және «Заң мен тәртіп» қағидаттарына негізделуге тиіс.
