Шығыс өңірінде «Таза Қазақстан» жалпыұлттық экологиялық қозғалысы жаңа деңгейге көтерілді. Облыс орталығының көрікті жерлерінің бірі – «Өскемен» аллеясында болашаққа бағдарланған айрықша акция өтті. Мектеп бітіруші түлектер, ұстаздар қауымы мен облыс басшылығы тізе қосып, 2,5 мыңға жуық қылқан жапырақты ағаш көшетін екті, деп хабарлайды F16.kz.
Бұл экологиялық бастама жай ғана ағаш отырғызу науқаны емес, жастардың туған қаласына деген шексіз құрметі мен азаматтық жауапкершілігінің көрінісі болды. Шараға арнайы қатысқан аймақ басшысы Нұрымбет Сақтағанов игі істің тәрбиелік мәніне тоқталды.
Қазір біз табиғатты аялауды, атамекенге деген перзенттік махаббатты және ертеңгі күнге деген зор жауапкершілікті біріктірген игілікті істің куәсі болып отырмыз. Әрбір жерге егілген көшет – бұл өңіріміздің экологиялық болашағына салынған инвестиция және қаламыздың көркейе түсуіне қосылған нақты үлес.
Бүгін Өскеменде 2400-ден астам мектеп бітіруші түлек көшет отырғызды. Демек, осынша бала өзінің туған қаласымен тамырлас болды деп айта аламыз. Әрбір түлек өзі еккен талын ұмытпауы керек. Кейін отбасылы болғанда өзінің балаларын осында әкеліп, еккен ағашын көрсетеді. «Атаңнан мал қалғанша, тал қалсын» деген қазақта сөз бар. Ағаш отырғызу тек табиғатқа жанашырлық емес, экономикалық тұрғыдан да пайдалы іс. Мемлекет басшысы ұдайы айтып келеді, «Таза Қазақстан» деген бұл – әр адамның ішкі жан-дүниесінің, мәдениетінің көрінісі. Ал ішкі мәдениеті жоғары жастардан болашақта елге тұтқа болар мықты азаматтар шығады, – деді Нұрымбет Сақтағанов.
Білім нәрімен сусындатқан қара шаңырақтан қанат қаққалы тұрған түлектерге бұл акцияның мәні бөлек. Оларға бұл көшеттер балалық шақпен қоштасу мен үлкен өмірдің басталуын айшықтайтын символдық белгі іспетті.
Сіздердің алдыңыздан өмірдің жаңа парағы ашылғалы тұр. Бүгінгі отырғызған ағаштар сол бағыттың айқын символы болмақ. Мына көшеттермен бірге сіздер де өсіп-өркендеп, ел игілігі жолында аянбай еңбек ететіндеріңізге сенімдімін, – деді аймақ басшысы.
Акцияның басты ерекшелігі – әрбір егілген шырша белгілі бір түлекке бекітілді. Бұл әдіс жастардың өз еңбегінің нәтижесіне деген жанашырлығын арттырып, оны күтіп-баптауға деген ынтасын оятады.
Бүгін біз, облыстық дарынды балаларға арналған мектеп-лицей-интернатының түлектері «Таза Қазақстан» акциясы аясында аймақ басшысымен бірге «Өскемен» аллаясында көшет ектік. Бұл арқылы біз қаланы көркейтуге атсалысып қана қоймай, қоғамның экологиялық мәдениетін көтеруге үлес қосып жатырмыз. Осындай игі бастамалр біз сияқты жастардың рухани дамуына зор ықпал етеді, – деді 11-сынып оқушысы Әмина Серік.
Игі шараны ұйымдастырушылардың пікірінше, «Таза Қазақстан» бастамасы аясындағы бұл шара Өскеменнің табиғатын жақсартып, қоғамда экологиялық сананың берік орнығуына әсер етеді. Осылайша, Шығыс Қазақстанда көгалдандыру жұмыстары жаңа серпінмен жалғасып, қаланың эстетикалық келбеті де жаңарып келеді.
