Шығыс Қазақстанда тұрғын үйдегі өрт оқиғалары жиілеген. Төтенше жағдайлар департаментінің мәліметінше, жылыту маусымы басталғалы бері облыста 287 өрт болған. Бұл өткен маусымдағы осы кезеңімен салыстырғанда 11 пайызға жоғары, деп хабарлайды F16.kz.
Тілсіз жаудан 21 адам көз жұмса (өткен маусымнан 5 пайыз жоғары), 21 адам жарақат алған (өткен маусымнан екі есе көп). Құтқарушылардың айтуынша, қайғылы жағдайдың дені өрт қауіпсіздігі талаптарын сақтамаудан және тұрғын үйдің техникалық жағдайының нашарлығынан болған. Соған қарамастан өңірде алдын алу жұмыстары кең көлемде жүргізіліп келеді. Мамандар 91 мыңнан астам үйді аралап, тұрғындарға пешті және электр құралдарын пайдалану ережелері мен қауіпсіздік талаптарын түсіндірген.
Бүгінде пешке от жағатын әлеуметтік жағдайы төмен отбасылар тұратын 2 763 үй бақылауға алынған. Тексеру барысында 700-ден астам заң бұзу дерегі анықталған. Олардың көбі пешті дұрыс пайдаланбау және электр желілерінің тозуына қатысты болды. Анықталған кемшіліктерді жою жұмысы жүргізіліп жатыр.
Сонымен қатар мұқтаж отбасыларға пеш пен электр желісін жөндеуге көмек көрсетілді. Әлеуметтік осал топқа жататын тұрғындардың үйіне 680 көміртек тотығын анықтайтын аспап орнатылды. Бұл құрылғылар көп адамның өмірін сақтап қалуға көмектескен. Жалпы, соңғы 6 жылда облыста 17 мыңнан астам аспап орнатылып, 45 адамның өмірі құтқарылған. Оның 31-і – балалар.
Құтқарушылар тұрғындарға қауіпсіздік ережелерін қатаң сақтауды ескертеді: мұржаны уақытында тазалап, жанып тұрған пешті қараусыз қалдырмау, пешті қатты қыздырмау және оның үстіне жанғыш заттар кептірмеу қажет.
Электр құралдарын қолданғанда токты шамадан тыс жүктемеу, тек жарамды құралдарды пайдалану, оларды қараусыз қалдырмау және электр сымын тек мамандарға жөндету маңызды.
Өрт болғанда бірден 101 немесе 112 нөміріне хабарласу қажет.
Мамандардың айтуынша, өрттің алдын алуда ең бастысы – әр адамның жеке жауапкершілігі мен қауіпсіздік талаптарын сақтау.
