Шығыс Қазақстан облысында қатты тұрмыстық қалдықтарды қайта өңдеуге шетелдік инвесторлар тартылмақ. Бұл туралы облыс әкімі Нұрымбет Сақтағанов Үкімет отырысында мәлім етті, деп хабарлайды F16.kz.
Аймақ басшысы қалдықтарды өңдеу мәселесі стратегиялық маңызға ие екенін атап өтті.
Өнеркәсіп кәсіпорындарынан шығарылған 2 млрд тоннадан астам техногендік минералды қалдық есепке алуды, қауіпсіз сақтауды және оларды қайта айналымға қосуды талап етеді. Сонымен қатар облыс халқы жыл сайын шамамен 300 мың тонна тұрмыстық қалдық шығарады, — деді Нұрымбет Сақтағанов.
Оның айтуынша, өңірде қалдықтарды қайта өңдеу үшін Германия, Қытай және Швейцариядан инвесторлар тарту жүргізіліп жатыр.
Қазір аймақта тұрмыстық қалдықтарды жинау, шығару және сұрыптау жолға қойылған. 2026 жылдан бастап коммуналдық қалдықтармен жұмыс істейтін цифрлық орта құру көзделіп отыр.
