Ұлттық бірыңғай тестілеудің мазмұны мен әдістемесі қайта қаралады. Бұл жұмысқа әлемнің ең мықты компаниясы тартылады, деп хабарлайды F16.kz.
Мемлекет басшысы Нью-Йоркке жасаған жұмыс сапары барысында Educational Testing Service (ETS) компаниясының басшылығымен кездесті. Аталған компания жыл сайын әлемнің 180 еліне 50 миллионнан астам тест әзірлейді және ұлттық білім беру жүйесіне арналған бейіндік шешімдер ұсынады. Қазақстан тарапынан компанияның тәжірибесін пайдалануға қызығушылық бар.
Ғылым және жоғары білім министрі Саясат Нұрбектің айтуынша, 80 жылдық тарихы бар ғылыми орталық тестерді әзірлеп қана қоймай, тестологияны зерттеумен де айналысады.
Біздің ұлттық бірыңғай тестілеудің сапасын арттыру мен мазмұнын қайта қарастыру шаралары осы ең ірі, ең атақты тестология орталығымен бірге атқарылады. Ол үшін арнайы жұмыс тобы құрылады. ETS-тің ең мықты мамандарын тарта отырып, ұлттық бірыңғай тестілеудің мазмұны мен әдістемесі қайта қаралады, — деді министр.
Келесі айда зерттеушілер делегациясы Қазақстанға келеді. Олар ҰБТ-ның трансформациясын жасайды.
