Үлкен Нарын ауданында «Қамқорлық» қорының қатысуымен мүгедектігі бар балаларға арналған оңалту орталығын ашу жоспарланып отыр. Бұл туралы ШҚО әкімі аудан халқымен кездесуде айтты, деп хабарлайды F16.kz.
Аталған орталық тек Үлкен Нарын ауданының тұрғындары үшін емес, Алтай, Катонқарағай және Күршім аудандарын да қамтуға мүмкіндік береді.
Балаларға арналған тәуліктік және күндізгі оңалту орталығын ашу үшін аудандық аурухана ғимаратының 1 және 2 қабаттары бөлінді. Ғимаратты жөндеуді бюджет қаражаты есебінен жүргізу үшін ғимаратты аудандық аурухананың балансынан аудандық коммуналдық меншікке беру қажет. Жауапты мамандарға тапсырма берілді, — деді аймақ басшысы.
Сондай-ақ облыс әкімі ауданда қатерлі ісікпен ауру 26,2%-ға төмендегенін, десе де қатерлі ісіктен өлім-жітім 19,8%-ға артқанын атап өтті.
Туберкулезбен ауру да үш есеге артып, бір нәресте өлімі тіркелген. Осыған байланысты облыстық денсаулық сақтау басқармасы Үлкен Нарын ауданының әкімімен бірлесіп нақты ұсыныстар енгізіп, қажетті медицина кадрларын тарту жұмыстарын жүргізуі қажет, — деді ол.
