Үлкен Нарын ауданында соңғы жылдары өнеркәсіп пен туризм саласына көңіл бөлініп, жеке инвестиция есебінен бірқатар жоба қолға алынған, деп хабарлайды F16.kz.
Жалпы, 2029 жылға дейінгі даму жоспарына сәйкес, ауданға 3,0 млрд теңге бюджет қаражатын және 9,6 млрд теңге жеке инвестиция тарту жоспарланған. Бұл туралы Үлкен Нарын ауданына жұмыс сапарымен барған ШҚО әкімі Нұрымбет Сақтағанов айтты.
Жеке инвестициялар есебінен былтыр 4,3 млрд теңгеге «Приморск» базасы кеңейтілді, Үлкен Нарын ауылында 35,6 млн теңгеге 24 орындық хостел ашылды және 50,0 млн теңгеге дүкен кеңейтілді.
Биыл да бұл сала қалыс қалып жатқан жоқ. Үлкен Нарын ауылында 29,5 млн теңгеге ет және ет өнімдерін өңдеу цехы, 31,4 млн теңгеге шағын қонақ үй ашылды. Көк-Терек ауылында 10 млн теңгеге наубайхана іске қосылды, «Приморск» туристік базасында 400 млн теңгеге пантымен емдеу орталығының құрылысы жүргізіліп жатыр, — деді аймақ басшысы.
Ауданның ауыл шаруашылығы саласы да қарқынды дамып келеді. Мало-Нарым ауылында 70 млн теңгеге 200 басқа арналған бордақылау алаңы салынып жатыр. Ауқымды жоба жоспар бойынша 2026 жылдың екінші тоқсанында аяқталуға тиіс.
