Абай Құнанбайұлының 180 жылдық мерейтойына орай ұлы ақынның туған жерінде көптеген шара ұйымдастыру көзделген. Оған 30 мыңнан астам адам қатысады деген болжам бар, деп хабарлайды F16.kz.
Олардың арасында 15 елден шетелдік делегация, ғылыми және шығармашылық зиялы қауым, жастар, өнерпаздар және БАҚ өкілдері бар. Қазір Абай ауданында 200-ден астам киіз үй тігіліп жатыр. Шараларды ұйымдастыруға жүздеген мәдениет қайраткері, аспаздар, техникалық мамандар, 530 волонтер, ардагерлер атсалысады.
Абай облыстық мәдениет басқармасы басшысының орынбасары Бауыржан Мұстафиннің айтуынша, 1-10 тамыз аралығында 70-тен астам ірі іс-шара, концерттік бағдарлама, 10 театрландырылған қойылым, сегіз көрме мен фестиваль, ұлттық жарыс, бес республикалық және халықаралық шығармашылық жоба қамтылған.
Абай атамыздың 180 жылдығына орай ұйымдастырлған шаралар бірінші рет 10 күндік ретінде аталып өтіп жатыр. 1 тамызда «Абай академиясы» атты энциклопедиялық портал іске қосылды. Абай мұрасы цифрлық кеңістікке жол ашты. Семейде ұлттық өнерді, салт-дәстүрді дәріптейтін этноауыл қалашығы ашылды. Белгілі иллюстратор Аңсаған Мұстафаның «Көңілге түрлі ой салар» атты көрмесі, «Асыл мұра» қолөнершілер фестивалі, «Адамзаттың алыбы хәкім Абай» мерейтойлық концерті өтті, — деді басқарма басшысы.
Сонымен қатар Түркістан облысының мәдени күндері аясында 2-3 тамызда ауыл шаруашылығы өнімдері жәрмекесі, қолөнер шеберлерінің көрмесі және концерт ұйымдастырылды. Ал ерекше форматта өтіп, мыңнан астам адам қатысқан «Абай quiz» республикалық зияткерлік ойыны еліміздің рекордтар кітабына ұсынылды.
