Әл-Фараби атындағы Қазақ ұлттық университеті тарих факультетінде «Конституциялық реформа: Ұлы дала мемлекеттілігінің жаңа белесі» тақырыбында дөңгелек үстел өтті. Іс-шараға университеттің жетекші тарихшылары, құқықтанушылары мен ғалымдары қатысты. Олар елдегі ауқымды саяси өзгерістерді ұлттық тарихи мұра және мемлекеттіліктің бірегейлігі тұрғысынан талқылады.
Шараны ашқан тарих факультетінің деканы Досбол Байғонақов реформалар еліміздің болашағы үшін ерекше маңызды екенін атап өтті. Оның сөзінше, Мемлекет басшысының бастамасымен жүргізіліп жатқан өзгерістер адамға бағытталған басқару моделін нақты көрсетеді.
Бұл реформалар – Ұлы дала мемлекеттілігінің тарихи сабақтастығын заң жүзінде бекітудің жаңа кезеңі. Әділетті Қазақстан құру жолындағы берік құқықтық негіз. Бүгін қабылданатын шешімдер ертеңгі тарихтың өзегіне айналады, – деді Досбол Байғонақов.
Қатысушылар демократиялық институттардың даму эволюциясына ерекше назар аударды. Профессор Берекет Кәрібаев кешегі мен бүгінгінің ұқсастықтарын мысалға келтірді. Оның пікірінше, Ұлы даладағы демократиялық дәстүрлер ежелгі дала заңдарынан бастау алып, қазіргі Конституцияда логикалық жалғасын табады. Бұл мемлекеттік құрылымның тұрақтылығын қамтамасыз етеді.
Профессор Аманжол Қалыш халық өкілдігі институттарын жаңғырту мәселесіне тоқталды. Ол Ұлттық құрылтайдың жаңа мәртебеге ие болғанын ерекше атап өтті.
Кездесу барысында «Алаш» қайраткерлерінің конституциялық идеялары мен «Әділетті Қазақстан» тұжырымдамасының үндестігі де айтылды Қатысушылар қазіргі конституциялық реформаның билік тармақтары арасындағы тепе-теңдікті күшейтіп қана қоймай, мемлекет пен азаматтар арасындағы өзара сенімге негізделген жаңа қоғамдық келісім қалыптастыратынын атап өтті.
