ЮНИСЕФ ел халқының шамамен 34 пайызына тең 6,9 миллион баланың әл-ауқатын жақсартуға бағытталған «Қазақстан балалары» (2026–2030) кешенді ұлттық стратегиясының қабылданғанын құптайды.
Қазақстан Республикасының Президенті Қасым-Жомарт Тоқаевтың бастамасымен әзірленген бағдарлама балалардың мүддесін қорғауға бағытталған мемлекеттік саясаттың бірыңғай стратегиялық пайымын қалыптастырады. Ол 2026–2030 жылдарға арналған әлеуметтік қорғау, денсаулық сақтау, білім беру және балалар қауіпсіздігін нығайту жөніндегі 158 нақты шараны қамтиды, оның жалпы бюджеті 2,6 млрд АҚШ долларын құрайды.
Бағдарлама отбасыларды қолдауға және позитивті ата-ана болу мәдениетін дамытуға, балалардың цифрлық қауіпсіздігіне, жаңа медициналық және оңалту мекемелерін салуды қоса алғанда, балаға бағдарланған инфрақұрылымды дамытуға, сондай-ақ инклюзивті және балаға мейірімді қызметтерді кеңейтуге ерекше назар аударады. Сонымен қатар, өңірлік деңгейде балаларды қорғау жүйесін нығайту, мамандардың кәсіби стандарттарын арттыру және мектептерде психологиялық қолдауды дамыту маңызды басымдықтар болып табылады.
ЮНИСЕФ ұлттық саясатқа Бала құқықтары туралы конвенцияның халықаралық нормалары мен стандарттарын, БҰҰ-ның жаһандық стратегияларын және әлемдік озық тәжірибелерді енгізуді қамтамасыз ете отырып, бағдарламаны әзірлеуде Қазақстан Үкіметінің негізгі стратегиялық серіктесі болды. ЮНИСЕФ сарапшылары бағдарламаның архитектурасын қалыптастыруда, оның ішінде тұжырымдамалық негіздерді, нәтижелер индикаторларын, салааралық үйлестіру тетіктерін, сондай-ақ іске асырылуын мониторингілеу және бағалау тәсілдерін әзірлеуде жүйелі қолдау көрсетті.
ЮНИСЕФ сондай-ақ балалар мен отбасыларды ерте анықтау және сүйемелдеу жүйелерін дамытуды, балаларды қорғауға арналған цифрлық шешімдерді, әлеуметтік және психологиялық қолдау қызметтерін кеңейтуді, сондай-ақ бала құқықтарын қорғау мамандарының кадрлық әлеуетін нығайтуды қоса алғанда, бағдарламаның негізгі компоненттерін әзірлеуге қолдау білдірді. Ұйым бағдарламаның балалардың шынайы қажеттіліктеріне бағдарлануын қамтамасыз ету үшін жаһандық дәлелді тәжірибелерге, MICS деректеріне және талдамалық зерттеулерге сүйенді.
Бағдарлама Қазақстан Республикасының Мемлекеттік кеңесшісі, Бала құқықтары жөніндегі уәкіл, Оқу-ағарту министрлігі, Балалардың құқықтарын қорғау комитеті, сондай-ақ азаматтық сектор мен ұлттық консультациялар барысында пікірлері ескерілген балалардың өздерінің қатысуымен тығыз ведомствоаралық ынтымақтастықтың нәтижесі болып саналады.
«Қазақстан балалары» бағдарламасын қабылдау Тұрақты даму мақсаттарына, соның ішінде ТДМ 3 «Денсаулық және әл-ауқат», ТДМ 4 «Сапалы білім» және ТДМ 10 «Теңсіздікті қысқарту» мақсаттарына қол жеткізуге маңызды үлес қосады және бала құқықтарын қорғаудың ұлттық жүйесін нығайтады.
ЮНИСЕФ халықаралық сараптаманы жұмылдыруды, ұлттық және өңірлік деңгейде реформаларды енгізуді қолдауды, қаржыландыру мен есеп берудің тұрақты жүйелерін дамытуды, сондай-ақ саясатты қалыптастыруда балалар мен жастардың қатысуын күшейтуді қамтамасыз ете отырып, бағдарламаны іске асыруда Қазақстан Үкіметімен стратегиялық серіктес ретінде жұмысын жалғастырады.
