Шығыс Қазақстандағы ірі су айдындарының бірі — Зайсан көлінде балықтардың жаппай қырылуының алдын алу мақсатында аэрация жүргізілді. Жұмыс көлдің сол жағалауындағы Тұзды учаскесінде өтті, деп хабарлайды F16.kz.
Қыс мезгілінде балықтардың мұз астында қырылуының негізгі себебі – суда оттегінің жетіспеуі. Мұз қалыңдап, су беті ұзақ уақыт жабық тұрған кезде ауа жетуі қиындайды. Соның салдарынан судағы оттегі мөлшері азайып, балықтарға қауіп төнеді. Осы жағдайдың алдын алу үшін мамандар аэрация жұмысын жүргізеді. Бұл жолы Зайсан балық инспекциясының қызметкерлері Тарбағатай ауданының Тұғыл ауылына барды.
АЭРАЦИЯ ҚАЛАЙ ЖҮРГІЗІЛЕДІ?
Аэрация барысында мамандар мұзды ойып, бірнеше ойықтар жасайды. Кейін сол жерлерге шоқ-шоқ қамыс тасталады. Қамыс арқылы суға ауа еркін өтіп, түбіндегі балықтарға қажетті оттегі жеткізіледі. Мұндай жұмыс жыл сайын ақпан-наурыз айларында ұйымдастырылады. Дәл осы кезеңде судағы оттегі азайып, балыққа қырылу қаупі төнеді.
Елдегі су ресурстарының шамамен 40 пайызы шоғырланған Шығыс Қазақстан облысында су айдындарын қорғау жұмысы жүйелі жүргізіліп келеді. Әр жылы көлдер мен өзендерде мыңдаған аэрациялық ойық ойылады. Жұмыс кезінде мұз ойғыш құралдар мен арнайы техника пайдаланылады. Бұл қарапайым процесс болып көрінгенмен, балық қорын сақтауға және су экожүйесінің тепе-теңдігін қамтамасыз етуге зор үлес қосады.
