Зайсан мен Катонқарағай аудандарында салынып жатқан жаңа әуежайларға еуропалық ATR компаниясының ұшақтары ұшуы мүмкін, деп хабарлайды F16.kz тілшісі.
Бұл туралы ҚР Көлік министрлігі Азаматтық авиация комитетінің төрайымы Салтанат Томпиеваның ATR Еуропа мен Орталық Азиядағы сату жөніндегі Вице-президенті Жером Габоримен кездесуі барысында белгілі болды.
Кездесу барысында тараптар өңірлік әуепаркті жаңарту саласындағы ынтымақтасты, ATR заманауи турбовинтті әуе кемелерін жеткізу мүмкіндіктерін, сондай-ақ техникалық қызмет көрсету, персоналды оқыту мәселелерін талқылады.
«SCAT Airlines» әуе компаниясы бұл ұшақтарды бүгінде құрылысы жүріп жатқан Зайсан, Катонқарағай мен Кендірлідегі (Маңғыстау облысы) үш жаңа әуежайға рейстер орындау үшін сатып алуды қарастырып отыр.
Айта кетейік, өткен ғасырдың 80-ші жылдарында құрылған ATR бірлескен француз-итальян компаниясы авиациялық техника өндірумен айналысатын Еуропадағы алдыңғы қатарлы кәсіпорынның бірі. Компания 40-тан 74 орынға дейін жолаушы тасымалдай алатын ATR42 және ATR72 турбовинтті ұшақтарын шығарады.
