Әлеуметтік желілерде Шығыс Қазақстан облысының Зайсан қаласында белгісіз біреулер оқ атып, ер азаматты жарақаттағаны туралы ақпарат тарады. F16.kz редакциясы ШҚО полиция департаментіне хабарласып, ресми жауап алды.
Желіде тараған мәліметке сүйенсек, оқыс оқиға 8 сәуір күні түнде болған. Белгісіз біреулер қару қолданып, жас жігітті жаралаған. Жапа шегуші дереу аудандық ауруханаға жеткізіліп, жансақтау бөліміне жатқызылған. Қастандық жасағандар автокөлікке мініп, оқиға орнынан бой жасырып үлгерген. Алайда полция қызметкерлері оларды ұзатпай қолға түсірді.
Шығыс Қазақстан облысының полиция департаменті 8 сәуірде Зайсан ауданының полиция бөлімі адам өлтіруге оқталу фактісі бойынша сотқа дейінгі тергеу бастағанын хабарлайды. Екі күдікті жедел түрде анықталып, ұсталды. Қылмыс қаруы тәркіленді. Қазір олар уақытша ұстау изоляторына қамалды. Полиция қызметкерлері оқиғаның мән-жайын толық, объективті және жан-жақты зерттеуге бағытталған қажетті тергеу әрекеттерін жүргізіп жатыр.
Қазақстан Республикасының Қылмыстық-процестік кодексінің 201-бабына сәйкес өзге ақпарат жария етуге жатпайды. – деп жазды ШҚО ПД баспасөз қызметі.
